"ლევერკუზენმა" ჩაბი ალონსოს ჩამნაცვლებელი უკვე შეარჩია

გერმანულ მედიაში ვრცელდება ცნობები, რომ ერიკ ტენ ჰაგი კარიერის ბუნდესლიგაში გაგრძელებისკენ იხრება. ცნობილმა სპორტულმა ჟურნალისტმა, ფლორიან პლეტენბერგმა „Sky“-ს ეთერში განაცხადა, რომ ნიდერლანდელი სპეციალისტი ერთ-ერთ წამყვან კანდიდატად განიხილება „ბაიერ ლევერკუზენის“ მთავარი მწვრთნელის პოსტზე.

პლეტენბერგის ინფორმაციით, ლევერკუზენის კლუბის ხელმძღვანელობა უკვე აწარმოებს შიდა განხილვებს და სერიოზულად ფიქრობს ტენ ჰაგის კანდიდატურაზე, თუმცა საბოლოო გადაწყვეტილება ჯერ მიღებული არ არის. კლუბი ჯერ კიდევ არსებული მწვრთნელის, ხაბი ალონსოს, პასუხს ელოდება, რომელიც შესაძლოა მიმდინარე სეზონის დასრულების შემდეგ მადრიდის „რეალს“ მიაშუროს.

შეგახსენებთ, რომ ხაბი ალონსო ამჟამად ფენომენალურ სეზონს ატარებს „ბაიერ ლევერკუზენთან“. ესპანელმა სპეციალისტმა გუნდი არამარტო ბუნდესლიგის სატურნირო ცხრილის სათავეში დააბრუნა, არამედ მას ევროპულ ასპარეზზეც სოლიდური წარმატება მოუტანა, რაც ავტომატურად გაზარდა ინტერესი მის პერსონაზე — განსაკუთრებით „რეალის“ მხრიდან.

ტენ ჰაგი კი ამჟამად თავისუფალია. ნიდერლანდელმა გასული წლის შემოდგომაზე „მანჩესტერ იუნაიტედის“ მთავარი მწვრთნელის პოსტი დატოვა, სადაც ის ორ წელიწადს მოღვაწეობდა (2022-2024). მისი ხელმძღვანელობით ინგლისურმა გრანდმა მოახერხა ორი ტიტულის მოპოვება — ინგლისის ლიგის თასი და ასოციაციის თასი, თუმცა საბოლოოდ შედეგები კლუბის მოლოდინს ვერ შეესაბამა.

ტენ ჰაგის სახელი ფართო საზოგადოებისთვის განსაკუთრებით 2019 წელს გახდა ცნობილი, როდესაც მან ამსტერდამის „აიაქსი“ ჩემპიონთა ლიგის ნახევარფინალამდე მიიყვანა. მისი სწრაფი, შემტევი და ორგანიზებული ფეხბურთი ხშირად იწვევდა აღფრთოვანებას როგორც სპეციალისტების, ისე გულშემატკივრების მხრიდან.

თუ ხაბი ალონსო ნამდვილად დატოვებს „ბაიერს“, ტენ ჰაგის შესაძლო დანიშვნა კლუბისთვის არა მხოლოდ სტაბილურობის შენარჩუნების მცდელობა იქნება, არამედ კიდევ ერთი ძლიერი განაცხადი ბუნდესლიგაში მწვრთნელების ელიტაში პოზიციონირებისთვის.